ଶରତ ଆସିଲା - ସ୍ଵର୍ଣ୍ଣଲତା ପତି

ସ୍ଵର୍ଣ୍ଣଲତା ପତି

---

ଶରତ ଆସିଲା ମରତ ହସିଲା 

ହସିଲା କୁଆଁରୀ ଜହ୍ନ,

ବାରିଦ ଭାସିଲା ଶିଶିର ଖସିଲା 

ଉଲ୍ଲସିଲେ ତରୁତୃଣ ॥

ଶେଫାଳୀ ବାସିଲା ପଦ୍ମ ବିକଶିଲା 

କୁମୁଦଟି ସରୋବରେ,

ଚାମର ବିଞ୍ଚିଲା ଶୁଭ୍ର କାଶତଣ୍ଡୀ 

ନଈପଠା ଗୋହିରୀରେ ॥

ଦଶରା ଆସିଲା ମଣ୍ଡପ ସାଜିଲା 

ପୁର ଗ୍ରାମ ନଗରୀରେ,

ଟମକ ବାଜିଲା ପୂଜାସଜ ହେଲା

ମାଆ ବିଜେ ଧରଣୀରେ ॥

ଦିଗ ନିରିମଳ କାଚକେନ୍ଦୁ ଜଳ 

ତହିଁ ଖରା ଛାଇ ଖେଳ,

ସମୀର ବହିଲା ଶୀତଳତା ଘେନି 

ମଧୁର ଶରତ କାଳ ॥

ଗୀତ ଶୁଭିଗଲା ବଉଳବେଣୀର 

କୁଆଁର ପୁନେଇଁ ପୁଚି,

ଜୋଛନାରେ ଭରା ଜହ୍ନିଫୁଲ ତୋରା 

କୁଆଁରୀ ମନଟି ନାଚି ॥

ତରୁଏ ହସିଲେ ଫୁଲଫଳ ଘେନି

ପକ୍ଷୀଏ ଗାଇଲେ ଗୀତ,

ସବୁଜିମା ଭରେ କେଦାରେ କେଦାରେ

ଶସ୍ୟରେ ହସିଲେ କ୍ଷେତ ॥

ଉତ୍ତରା ଶାସନ, କୌଶଲ୍ୟା ଗଙ୍ଗ, ପିପିଲି, ପୁରୀ

Now staying at - Washington, USA

---

VOL.IX,  ISSUE.IX,  SEPTEMBER-2025

Published By Banamallira Mahak