ବାଜି, ଚାଖି, ଦୋରା ଆଉ ଚକରା, ଧରଣୀ
ଜୟୀ ରାଜଗୁରୁ, ପାଟ୍ଟମହାଦେଈ ରାଣୀ,
ତୁମ୍ଭ ସ୍ଵାଭିମାନେ ଗର୍ବ ଉତ୍କଳ ଜନନୀ
ଆସି ଦେଖ ସର୍ବେ ଏକ ବିଵଶ କାହାଣୀ ॥
ସଚିବ ତିଆରି ଏକ ଛତ୍ରୀ ଶାସନରେ
ନିଦ୍ରା ଛନ୍ତି ରାଜା ଏବେ ସୁଖ ଛାଉଣିରେ
ସ୍ଵାଭିମାନ ବନ୍ଧା ଆଜି ସାଲିସ୍ର ବଣେ
ଗୁରୁଙ୍କର ମଥା ଏଠି ବାରମ୍ବାର ଭ୍ରମେ ॥
ଚୁକ୍ତି କରି ଦେଲେ ଗୁରୁ ସ୍ଵାଭିମାନ ବିକି
ଛାତ୍ରଛାତ୍ରୀଙ୍କର ନାହିଁ ପାଠରେ ସଉକି
କୃଷକର ପାଖେ ଏବେ ବିହନ ସମାଧି
ଶ୍ରମିକକୁ ମିଳେ ଏଠି ଦାଦନ ଉପାଧି ॥
ଦରମାଖିଆଏ ହେଲେ ନୂଆ ପୁଞ୍ଜିପତି
ଶୋଷଣେ ଛନ୍ତି ପ୍ରଜାଏ ଦହନୀୟ ସ୍ଥିତି
ନ୍ୟାୟାଳୟ ଖେଳେ ପୁଣି ସଂସ୍କାରର ବାଜି
ବିବଶତା ତାଳେ ଏଠି ସର୍ବ ବୁଦ୍ଧିଜୀବି ॥
ଓଡ଼ିଆ ଭୁଲିଛି ନିଜ ଜାତି ପରିଚୟ
ଆନ ବାପେ ଲଭିବାକୁ ସ୍ଵାର୍ଥର ବିଜୟ
ସୁଖ ଶିରୀ ନାହିଁ ଆଉ ସବୁ ସାତପର
ଉତ୍କଳ ଜନନୀ ଦୁଃଖ ଅସହ୍ୟ ଅପାର ॥
ଷଡ଼ୈକଳା, ଖରସୁଆଁ ଆଉ ସିଂହଭୂମି
ବସ୍ତର, ମେଦିନୀପୁର ଆଦି ଖଣ୍ଡ ଜମି
କଟା ଅଙ୍ଗ ଥିଲା ଯାହା ଫେରି ନାହିଁ ଆଉ
ଏବେ ପୁଣି ଷଡ଼ଯନ୍ତ୍ର ଦିଶେ ଦାଉ ଦାଉ ॥
ଜାଣେ ମୁହିଁ ତୁମ୍ଭେ ସର୍ବେ ଅମୃତ ସନ୍ତାନ
ଦେଇ ଯାଅ ପ୍ରତି ପ୍ରାଣେ ବିଦ୍ରୋହର ସ୍ଵନ
ତୁମ୍ଭ ଆଶୀର୍ବାଦେ ଜାଗୁ ଓଡ଼ିଆଙ୍କ ପ୍ରାଣ
ସ୍ଥିତପ୍ରଜ୍ଞ ହୋନ୍ତୁ ସର୍ବେ ଲଭି ସ୍ଵାଭିମାନ ॥
ବେଗୁନିଆପଡା, ଗଞ୍ଜାମ
ମୋ - ୭୯୮୪୨୫୯୦୮୦
VOL.IX, ISSUE.IX, SEPTEMBER-2025
Published By Banamallira Mahak
