ମାଆ ପଣତକୁ ନେତ୍ରେ ଦେଖିଦେଲେ
ଦୂରେଇ ଯାଏ ମୋ ଦୁଃଖ,
ମାଆ ବୋଲି ତା'ର ନାମ ତୁଣ୍ଡେ ନେଲେ
ପାଏ ମୁଁ ବୈକୁଣ୍ଠ ସୁଖ ।

ମାଆ ହାତ ଛୁଆଁ ସାତ ସିନ୍ଧୁ ବଳ
ଦୁର୍ବଳ ବି ହୁଏ ଯୋଦ୍ଧା,
ମାଆ ଆଶୀର୍ବାଦ ସଦାବେଳେ ସାଥେ
ଡରିବିନି ଦେଖି ବାଧା ।

ମାଆ ପଣତରେ ତିନି ରଙ୍ଗ ଥାଇ
ଦେଇଛି ସେ କେତେ ଶିକ୍ଷା,
ଶାନ୍ତି ମଇତିରୀ ପ୍ରଗତି ପଥରେ
ମାଗିବି ସ୍ବାଧୀନ ଭିକ୍ଷା ।

ମାଆ ତନୁ ନୀର କ୍ଷୀର ହୋଇ ବହେ
ସନ୍ତାନ ଜୀବନ ପାଇଁ,
ଶୀରା ଭେଦ କରେ ବୀର ରକ୍ତ ହୋଇ
ଜାତକେ ହାରିବା ନାହିଁ ।

ମା' ପଣତ ମୋର "ସୁରକ୍ଷା କବଚ"
ଶିରେ ବିଜୟ ମୁକୁଟ,
ରଣ କରିବି ମୁଁ ରଣ ପ୍ରାଙ୍ଗଣରେ
ଅଧର୍ମି କରି ନିପାତ ।

ମାଆ ପାଦ ଧୂଳି ମଥାରେ ମୋ ବୋଳି
ସତ୍ୟ ରକ୍ଷା କରୁଥିବି,
ମୃତ୍ୟୁ ନାହିଁ ମୋର ଦଣ୍ଡ ନାହିଁ ମୋର
ମାଆ କୋଳେ ଶୋଇଥିବି ।

ରଚନା : ଭଜରାମ ସେଠୀ

ଠିକଣା : ନିରାଳ ,ଗଂଜାମ, ଓଡ଼ିଶା ଦୂରଭାଷ : 9566876504