ପୁଣ୍ୟ ଭାରତର ଅଜାତଶତ୍ରୁ - ଜୟଶ୍ରୀ ପଟ୍ଟନାୟକ

ପୁଣ୍ୟ ଭାରତର ଅଜାତଶତ୍ରୁ
ଭାରତରତ୍ନ ହେ ତୁମେ
କୋଟି କଣ୍ଠୁ ଆଜି ଗୁଞ୍ଜରିତ ହୁଏ
ଅଟଳ ଅମର ତୁମେ ।1।
ରାଷ୍ଟ୍ରନେତା ହୋଇ ସଂସଦ ଆକାଶେ
ଧ୍ରୁବତାରା ଥିଲ ତୁମେ
ପୋଖରାନ ଆଉ କାର୍ଗିଲ ବିଜୟର
ନାୟକ ବି ଥିଲ ତୁମେ ।2।
ସ୍ୱର୍ଣ୍ଣ ଚତୁର୍ଭୁଜେ ଦେଖାଇଥିଲ
ଦୂରଦର୍ଶୀ ଅସୀମତା
ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ କରି
ହୋଇଥିଲ ରାଷ୍ଟ୍ରନେତା ।3।
କବି ଥିଲ ପୁଣି ଧୁରୀଣ ବକ୍ତା
ହିନ୍ଦୀ ଭାଷଣ ପ୍ରିୟ
ଦିଲ୍ଲୀ ଲାହୋର ବସ ସେବା ଦେଇ
କରିଛ ହୃଦୟ ଜୟ ।4।
କ୍ଷମତା ଆସିବ କ୍ଷମତା ଯିବ
ଦଳ ବି ବଦଳୁଥିବ
ତୁମପରି ଏକ ଯୋଦ୍ଧା ପାଇଁକି
ଦେଶ ସଦା ଝୁରୁଥିବ ।5।
ବୀର ପ୍ରସବିନୀ ଭାରତ ମାଆର
ଥିଲ ତୁମେ କୋଟିନିଧି
ଝୁରୁଛି ଜନତା, ଝୁରୁଛନ୍ତି ନେତା
ବାମ ହେଲା ଆଜି ବିଧି ।6।
ନଶ୍ୱର ଶରୀର ପଞ୍ଚଭୂତେ ମିଶେ
ରହିଯାଏ ଯଶକୀର୍ତ୍ତି
ଲୀନ ହୁଏ ସିନା ମର ଶରୀର ଟା
ଅକ୍ଷୁର୍ଣ୍ଣ ରୁହେ ତା ସ୍ମୃତି ।7।

---

ଜୟଶ୍ରୀ ପଟ୍ଟନାୟକ
ମଧୁସୂଦନ ନଗର, ଜଟଣୀ