• ମାଘ ଶେଷହେଲା ଶୀତ ଧୀରେ ଧୀରେ ଛାଡ଼ି ଛାଡି ଯାଏ ମହୀ
• ଦକ୍ଷିଣ ଦିଗରୁ ମଳୟ ଗିରିରୁ ମଳୟ ଆସଇ ବହି ।।
• ବକୁଳ ପେନ୍ଥାରେ ଚୁତଫଳ ଚଣା ବସନ୍ତ ରାଜା ଆଗମ
• କହି ପରଭୃତ ସୁ-ମଧୁର ରାଗେ ତୋଳଇ ପଞ୍ଚମ ତାନ ।।
•
• ରଙ୍ଗ ବେରଙ୍ଗ ର ନାନାଜାତି ସୁମ ବାଢିଛି ଶୋଭା ସମ୍ଭାର
• ଦିଶଇ ପ୍ରକୃତି ରାଣୀ ଗଭାମଣ୍ଡି ଆସେ କି ବସନ୍ତ କାଳ ।।
• କାକକୃଷ୍ଣ କାଚକନ୍ଦୁକ ଜିବନ ସର, ହ୍ରଦ, ନଦ, ନଦୀ
• ଗରଭେ ଧରିଛି ଅନିନ୍ଦ୍ୟ ସୁନ୍ଦର ଦିଶଇ ବିଚିତ୍ର ଛବି ।।
•
• ସରେ ସରୋରୁହ ବିମଳ କୋମଳ ଦୁଧ ଅଳତାର ରଙ୍ଗ
• ସଙ୍ଗେ ତା ମଧୁର ସଉରଭ ବାଣ୍ଟେ ଉଡେ ମତୁଆଲା ଭୃଙ୍ଗ ।।
• ସବୁଜ ବନାନୀ ନବ ପଲ୍ଲବୀତ ପଲ୍ଲବେ ହୋଇଛି ଉଭା
• ସତେକି ବସନ୍ତ ଆଗମେ ଧରଣୀ ପିନ୍ଧିଛି କି ଛିଟ ଲୁଗା ।।
•
• ବସନ୍ତ ସମୟ ବଡ଼ ରସମୟ ଚମ୍ପା, ନାଗେଶ୍ଵର ଯୁଇ
• ବକୁଳ କୁଞ୍ଜରେ ରାଶ କୁଞ୍ଜକେଳୀ ମାଧବଙ୍କ ସଙ୍ଗେ ରାଇ ।।
• ହଳଦୀବସନ୍ତ କୁମ୍ଭାଟୁଆ ହୁଟ ଶବଦେ ମହୀ ଉଛୁଳେ
• ବସନ୍ତ ଆଗମେ ଶବ୍ଦାୟିତ ଧରା ସୁମଧୁର କୋଳାହଳେ ।।
•
• ଫଗୁଣ ମାସରେ ଅବିର ରଙ୍ଗରେ ରଙ୍ଗ ପିଚକାରୀ ଖେଳି
• ବସନ୍ତ ଆସିଲା ରାଧାରାଣୀ ସଙ୍ଗେ ଦୋଳି ଖେଳେ ବନମାଳୀ ।।
• କୃଷ୍ଣଚୁଡା ଆଉ ପଳାଶ ମଝିରେ ସୁନାରୀ ସୁନେଲି ଫୁଲ
• ଫୁଟି ଦିଶୁଅଛି ବସନ୍ତ ରାଜାନ ପାଟଛତ୍ର ସମତୁଲ ।।
•
• ଚଇତି ଘୋଡ଼ା ର ନାଚରେ ଏମନ ଚଇତାଳି ଗୀତ ଗାଏ
• ସେଇଗୀତ ତାଳେ ବସନ୍ତ ରାଜନ ଧରାରୁ ବିଦାୟ ନିଏ ।।
• ଏମନ୍ତ ବସନ୍ତ କରେ ରସାଣିତ ପ୍ରକୃତି ବିଭୋର ହୁଏ
• ଋତୁଚକ୍ରରେ ଏ ଅପୂର୍ବ ଭାରତୀ ଗୀତ ରେ ପ୍ରଫୁଲ୍ଲ କହେ ।।
ପ୍ରଫୁଲ୍ଲ ଚନ୍ଦ୍ର ମିଶ୍ର, ମଙ୍ଗଳାଯୋଡି, ଖୋର୍ଦ୍ଧା
