ଆଦିମ ମାନବ ଥିଲା ଯାଯାବର
              ଅସଭ୍ୟ ଓ ଅଶିକ୍ଷିତ
ଉଲଗ୍ନ ମର୍କଟ ପଶୁପ୍ରାୟ ଭୁଞ୍ଜି
              ହେଉଥିଲା ଆନନ୍ଦିତ ॥
ଚଳଣି ଚରିତ୍ର ବଦଳିଲା ଧିରେ
              ବିଜ୍ଞାନ ଯାଦୁ ସ୍ପର୍ଶରେ
ଉନ୍ନତ ହେବାକୁ କିଏ ବା ଡାକିଲା
             ପରିବର୍ତ୍ତନ ସୁଅରେ ॥
ଗୁରୁଙ୍କ ଆଶ୍ରମ ଗାଁ ଅବଧାନ
              ଛାଡିଗଲା ବିଦ୍ୟାଳୟ
ଗୁରୁ ବା ଶିକ୍ଷକ ମେଳରେ ପଢିଲା
                ଫିଟାଇ ଶିକ୍ଷାବଳୟ ॥
ଅତ୍ୟାଧୁନିକତାର ସ୍ପର୍ଶରେ ବିଜ୍ଞାନ
                ଗଢିଲା କେତେ କମ୍ପ୍ୟୁଟର୍
କେତେ କମ୍ପ୍ୟୁଟର ସଂଯୋଗେ କଲାସେ
          ଈଣ୍ଟରନେଟ୍ କାରବାର ॥
ପୁରୁଣା ପଦ୍ଧତି ତ୍ରୁଟିକୁ ସୁଧାରି
           ଶିକ୍ଷଣ କାର୍ଯ୍ୟପଦ୍ଧତି
ସର୍ବଶିକ୍ଷା ଦେଲା ନୂଆ ଦିଗ୍ ଦର୍ଶନ
           ଯତନେ କୂଶଳେ ଅତି ॥
ଏନ୍ ସି ଏଫ୍ ଆଉ ସି ସି ଇ ଆସିଲା
            ବଢିଲା ଶିକ୍ଷାର ମାନ
ତା ସାଥେ ନବୀନ ଗୁରୁ ଇଣ୍ଟରନେଟ୍
            ଅପୂର୍ବ ତା ଅବଦାନ ॥
ଗୁଗୁଲ୍ ମାରିସେ ନିମିଷକେ ଦେଲା
              ଅଗଣିତ ଶିକ୍ଷାରାଶି
ଗଣିତ ବିଜ୍ଞାନ ଇତିହାସ ସାଥେ
             ଭୂଗୋଳ ସଂସ୍କୃତ ମିଶି ॥
କି ଇଂରାଜୀ କି ଓଡିଆ ହିନ୍ଦୀରେ
             ଯେତେ ପାର ଶିକ୍ଷା ପାଇ
ଇଣ୍ଟର୍ ନେଟ୍ କଲା ସବୁ ସମାଧାନ
             ସମନ୍ୱିତ ସୂତ୍ର ଧ୍ୟାୟୀ ॥
ଘରେ ବସି ବସି କଲା ବିଶ୍ଳେଷଣ
              ଅଭିନବ ପଦ୍ଧତିକୁ
ବିଷୟ ହେଉ ବା ସହ ବିଷୟ କି
             ବ୍ୟକ୍ତି ସମାଜ ଗୁଣକୁ ॥
ସାମାଜିକ ସାଥେ ଆଧ୍ୟାତ୍ମିକ ସୂତ୍ରେ
             ନୈତିକ ଶିକ୍ଷାର ରଙ୍ଗେ
ଶାରୀରିକ ଆଉ ମାନସିକ ତନୁ
             ବୌଦ୍ଧିକ ଚିତ୍ର ତରଙ୍ଗେ ॥
ସୂଚାଇଲା ପାଣିପାଗ,ପ୍ରାକୃତିକ
                ବିପର୍ଯ୍ୟୟର ସୂଚନା
ଛୋଟିଆ ଶିଶୁଟା ଇ ଶିକ୍ଷା ଯୋଗେ
              କଲା ସତର୍କ ବର୍ଣ୍ଣନା ॥
ବଞ୍ଚିବା ବଢିବା ସୁଖରେ ରହିବା
              ଶୈଳୀ ଦେଲା ଇ-ଶିକ୍ଷା
ସରସ ସୁନ୍ଦର କରିଲା ଜୀବନ
              ତେଜି ମନର କୁ ଶିକ୍ଷା ॥
ମହିଳା ଦିବ୍ୟାଙ୍ଗ ଖେଳ ମନଖୁସି
               ଦୀନ କିବା ଦୁଃଖି ପାଶେ
ଆକାଶ ଧରିତ୍ରୀ ମେଦିନୀକୁ ଚିହ୍ନି
              ଲୁହ ପୋଛିବାକୁ ବସେ ॥
ସଙ୍ଗୀତ ସଂସ୍କୃତି ପରମ୍ପରା ଶିକ୍ଷା
                   ଚଳଚ୍ଚିତ୍ର ମଧ୍ୟେ ବସି
ଭରିଲା ଆନନ୍ଦ ରଙ୍ଗର ମହଲ
                 ସ୍ନେହେ ଶ୍ରଦ୍ଧା ପ୍ରୀତି ମିଶି ॥
ବିନା ଶିକ୍ଷକରେ ବିନା ପୁସ୍ତକରେ
             ଦେଉଛି ଅପୂର୍ବ ଜ୍ଞାନ
ଧନ୍ୟ ଇ-ଶିକ୍ଷା ଧନ୍ୟ ତୋ ମହିମା
               କେ କରି ପାରିବ ଗାନ ॥

ନାରାୟଣ ଚନ୍ଦ୍ର ସେନାପତି, ଶିକ୍ଷକ,
ସରକାରୀ ଉ.  ପ୍ରା.  ବିଦ୍ୟାଳୟ,
ତେଇକୋଇ, କେନ୍ଦୁଝର, ପିନ୍-୭୫୮୦୧୯