![](https://blogger.googleusercontent.com/img/b/R29vZ2xl/AVvXsEhMqoB4vqJsja6PmC0z2TluOZRTAxwbBJgTMmNv_NUkLsCJj4JR5mN0DI5vLkrpbzZmAb59M5CaZirE33hbbHHxq-igY6v5XyeZBMXrmI0XXEOK1h-2rpVFK63djZbgttTubNvE7wBR4F8/s1600/ratira-rani.jpg)
ମନର ମାନସୀ ସପନରେ ଆସି
କହିଦିଏ ମିଠା କଥା ;ନିଶାର୍ଦ୍ଧ ରାତ୍ରୀରେ ଆସେ ଗୋପନରେ
ଖେଳିବାକୁ ପ୍ରେମ ଶଠା !!
ପ୍ରେମର ମନ୍ତର କରେ ନିରନ୍ତର
ରାତି ଅନ୍ଧାରରେ ବେଶି ;
ଆହାକି ସୁନ୍ଦର ରୂପକାନ୍ତି ତା'ର
ସରାଗରେ ଦିଏ ହସି !!
ସପନ ନାୟିକା ସ୍ମୃତି ଅନାମିକା
ହୃଦୟରେ କରେ ଘର ;
ପରିଚୟ ତା'ର ସତେ ଅଗୋଚର
ଢାଳି ଦିଏ ପ୍ରେମ ନୀର !!
ଏକି ଅନୁଭବ ପ୍ରେମରେ ସରାଗ
ମନପ୍ରାଣ ମୋର ଝୁରେ ;
ବାସ୍ତବ ଜୀବନେ ମିଳିବ କିମୋତେ
ଭାବନାରେ ଦିନ ସରେ !!
ସପନର ଗାଥା ହବ ସତକଥା
ବିଶ୍ୱାସରେ ବସା ବାନ୍ଧେ ;
ରାତ୍ରୀରାଣୀ ମୋର ଦିବସେ ଆସିବ
ଚାଲି ଚାଲି ସେତୁ ବନ୍ଧେ !!
ପ୍ରେମର ମହାର୍ଘ୍ୟ କରିବି ଅର୍ପଣ
ଦୁନିଆଁ ଦେଖିବ ସତେ ;
ସିନ୍ଥୀରେ'ମୁଁ ଦେବି ସୁହାଗ ସିନ୍ଦୁର
ଭଲ ସେ'ପାଇବ କେତେ !!
ହେ'ସପନର ରାଣୀ ସାଜିବୁ ଘରଣୀ
ରହିଲା ମୋ'ପ୍ରେମ ରାଣ ;
ତୋ ମଥାରେ ଓଢ଼ଣି ଦେବି ମୁଁ'ଟାଣି
ରଖିବି ପ୍ରେମର ପଣ !!
Writer's Details: ସଦାନନ୍ଦ ସାହୁ, ଧୁରୁଷିଆ, ଆଠଗଡ, କଟକ
Content Category:
Submission Date: Jul 26, 2019
0 Comments
You can write now your valuable comments here. Off-topic comments may be removed or deleted without prior notice.